ନୂଆଦିଲ୍ଲୀ,୧୭।୬: ଦେଶର ସ୍ବାସ୍ଥ୍ୟ ଭିତ୍ତିଭୂମିରେ ୫୦ ହଜାର କୋଟି ଟଙ୍କା ଖର୍ଚ୍ଚ ହୋଇପାରେ। କ୍ରେଡିଟ୍ ଇନସେନଟିଭ ବା ଋଣ ପ୍ରୋତ୍ସାହନ ଭାବେ ଏହାକୁ ଖର୍ଚ୍ଚ କରାଯିବ। ଏହି ଯୋଜନାରେ କମ୍ପାନୀ ଗୁଡିକ ଦ୍ୱାରା ନୂଆ ହସ୍ପିଟାଲ ସ୍ଥାପନ କରିବା, ଏହାର ବିସ୍ତାର ଏବଂ ମେଡିକାଲ ସପ୍ଳାଇ ଲାଗି କ୍ରେଡିଟ୍ ଫଣ୍ଡ ବ୍ୟବସ୍ଥା କରାଯିବାକୁ ଯୋଜନା ରହିଛି। କ୍ୟାବିନେଟ ନିକଟରେ ଏହି ପ୍ରସ୍ତାବ ରହିଥିବା ବେଳେ ଏହାକୁ ଶୀଘ୍ର ମଞ୍ଜୁରୀ ମିଳିପାରେ ବୋଲି କୁହାଯାଉଛି। ଏହା ଦ୍ୱାରା ଦେଶର ଟାୟାର ୨ ସହରଗୁଡିକୁ ଫୋକସ କରାଯିବ। ଏହି ଯୋଜନାରେ ହସ୍ପିଟାଲଗୁଡିକୁ ବିନା କୌଣସି ଗ୍ୟାରେଣ୍ଟିରେ ୨ କୋଟି ଟଙ୍କାର ଋଣ ମିଳିବ। ଅନସାଇଟ୍ ଅକ୍ସିଜେନ ପ୍ଲାଣ୍ଟ ଲାଗି ମଧ୍ୟ ୨ କୋଟି ଟଙ୍କାର ପାଣ୍ଠି ବ୍ୟବସ୍ଥା କରାଯିବ। ଏହାର ସମ୍ପୂର୍ଣ୍ଣ ଗ୍ୟାରେଣ୍ଟି ସରକାର ନେବେ। ଏଭଳି ବ୍ୟବସ୍ଥା ଦ୍ୱାରା କୋଭିଡ ସମ୍ପର୍କିତ ସ୍ବାସ୍ଥ୍ୟ ବ୍ୟବସ୍ଥା ଉପରେ ମଧ୍ୟ ସରକାରଙ୍କ ନଜର ରହିବ।
