ଜୟପୁର,୧୧।୬: ରାଜନୈତିକ ଦଳରେ ଏବେ ମିଶ୍ରଣ ପର୍ବ ଚାଲିଛି। ପୂର୍ବତନ ସହଯୋଗୀ ତଥା କଂଗ୍ରେସ ନେତା ଜିତିନ ପ୍ରସାଦ ଭାଜପାରେ ସାମିଲ ହେବା ପରେ କଂଗ୍ରେସ ନେତା ସଚିନ ପାଇଲଟ ମଧ୍ୟ ଦଳରେ ସାମିଲ ହେବେ ବୋଲି ଚର୍ଚ୍ଚା ହେଉଥିଲା। ଖୁବ୍ଶୀଘ୍ର ସେ ଭାଜପାରେ ସାମିଲ ହେବେ ଏବଂ ଏନେଇ ସେ ସଚିନଙ୍କ ସହ କଥା ହୋଇସାରିଛନ୍ତି ବୋଲି ଭାଜପା ନେତ୍ରୀ ରୀତା ବହୁଗୁଣା ଯୋଶୀ କହିଥିଲେ। ତେବେ ଶୁକ୍ରବାର ସମସ୍ତ କଳ୍ପନା ଜଳ୍ପନାର ଅନ୍ତ ଘଟାଇ ପାଇଲଟ ପୁଣି ଥରେ ଏହି ଆଲୋଚନାକୁ ଖଣ୍ଡନ କରିଛନ୍ତି। ସେ କହିଛନ୍ତି, ଭାଜପା ନେତ୍ରୀ ରୀତା ବହୁଗୁଣା ଏନେଇ ସଚିନ ତେନ୍ଦୁଲକର ସହ କଥା ହୋଇଥିବେ, ମୋ ସହ ନୁହେଁ। କାରଣ ମୋ ସହିତ କଥାବାର୍ତ୍ତା କରିବାକୁ ତାଙ୍କର ସତ୍ସାହସ ନାହିଁ। ପାଇଲଟଙ୍କ ଏଭଳି ବୟାନ ପରେ ରାଜନୈତିକ ଉଷ୍ମତା ଦେଖାଦେଇଛି।
