ସାଉଥାମ୍ପଟନ,୨୪।୬: ଡବ୍ଲୁଟିସିର ପ୍ରଥମ ସଂସ୍କରଣରେ ନ୍ୟୁଜିଲାଣ୍ଡ ୮ ଉଇକେଟରେ ଭାରତକୁ ପରାସ୍ତ କରି ଚାମ୍ପିୟନ ହୋଇଛି। ଦୀର୍ଘ ୯୧ ବର୍ଷରେ ନ୍ୟୁଜିଲାଣ୍ଡ ପ୍ରଥମଥର ପାଇଁ କୌଣସି ଅନ୍ତର୍ଜାତୀୟ କ୍ରିକେଟ କାଉନ୍ସିଲ(ଆଇସିସି) ବିଶ୍ୱକପ୍ ଟାଇଟଲ ହାସଲ କରି ଇତିହାସ ସୃଷ୍ଟି କରିଛି। ଅପରପକ୍ଷେ କୌଣସି ଉଇକେଟ ଯୋଡ଼ିରେ ବଡ଼ ଭାଗୀଦାରି ଗଢ଼ି ନ ପାରି ଭାରତ ସୁଯୋଗ ହାତଛଡ଼ା କରିଥିଲା। ଫଳରେ ୨୦୧୩ ପରଠାରୁ ଆଇସିସିର ପ୍ରମୁଖ ଟାଇଟଲ ହାସଲ କରିବାରେ ବିଫଳ ହୋଇଛି ଦଳ। ଏନେଇ ପ୍ରତିକ୍ରିୟା ରଖିଛନ୍ତି ଅଧିନାୟକ ବିରାଟ କୋହଲି। ସେ କହିଛନ୍ତି, ଯଦି ପାଗ ଅନୁକୂଳ ରହିଥାନ୍ତା ତେବେ ଆଉ କିଛି ଦିନ କ୍ରିକେଟ ଖେଳାଯାଇପାରିଥାନ୍ତା। ଏଥିରେ ସ୍ପିନରମାନେ ନିଜର କମାଲ ଦେଖାଇଥାନ୍ତେ। ଦଳରେ ପରିବର୍ତ୍ତନର ଆବଶ୍ୟକତା ନ ଥିଲା। କାରଣ ସର୍ବଶ୍ରେଷ୍ଠ ଏକାଦଶ ସହ ଦଳ ମଇଦାନକୁ ଓହ୍ଲାଇଥିଲା। ଏହାଛଡ଼ା ୩ ଦ୍ରୁତ ବୋଲର ଏବଂ ୨ ସ୍ପିନରଙ୍କୁ ଖେଳାଇବା ପ୍ରଶ୍ନରେ ସେ କହିଛନ୍ତି, ଆମେ ଏକମତ ହୋଇ ଏକାଦଶ ଚୟନ କରିଥିଲୁ। ଆମେ ସବୁ କ୍ଷେତ୍ରକୁ କଭର କରିବାକୁ ଚାହୁଁଥିଲୁ। ଉଇକେଟ ଆଉ ଟିକେ ଶୁଖିଥିଲେ ସ୍ପିନରଙ୍କୁ ଲାଭ ମିଳିଥାନ୍ତା। ଆମେ ଯେଉଁ ଖେଳାଳିଙ୍କୁ ନେଇ ପଡ଼ିଆକୁ ଓହ୍ଲାଇଥିଲୁ ସେମାନେ ବିଭିନ୍ନ ପରିସ୍ଥିତିରେ ଖେଳିବାରେ ସଫଳ ହୋଇଛନ୍ତି। ହେଲେ ଦଳରେ ଦ୍ରୁତ ବୋଲର ଅଲରାଉଣ୍ଡରର ଆବଶ୍ୟକତା ରହିଥିଲା ବୋଲି ସେ କହିଛନ୍ତି।
