ରାଞ୍ଚି,୨୦ା୬: ଜଣେ ମହିଳା ସଦର ହସ୍ପିଟାଲରେ ସନ୍ତାନ ପ୍ରସବ କରିବା ପାଇଁ ହସ୍ପିଟାଲରେ ଭର୍ତ୍ତି ହୋଇଥିଲେ। ମାତ୍ର ଡାକ୍ତରମାନେ କାହାକୁ କିଛି ନ ପଚାରି ମହିଳାଙ୍କର ଜନ୍ମ ନିୟନ୍ତ୍ରଣ ଅସ୍ତ୍ରୋପଚାର କରାଇ ଦେଇଛନ୍ତି। ଫଳରେ ଡାକ୍ତରଙ୍କ ନାମରେ ମାମଲା ରୁଜୁ ହୋଇଛି।
ରାଞ୍ଚିିର କାଣ୍ଟାଟୋଲିରେ ରହୁଥିବା ପୁନମ ଦେବୀ ସନ୍ତାନ ପ୍ରସବ ପାଇଁ ହସ୍ପିଟାଲରେ ଭର୍ତ୍ତି ହୋଇଥିଲେ। ଡାକ୍ତରମାନେ ତାଙ୍କର ନର୍ମାଲ ଡେଲିଭରି ହେବନି ସିଜରିଂ ହେବ ବୋଲି କହିଥିଲେ। ମାତ୍ର ସେଠାରେ ଡାକ୍ତରମାନେ କାହାକୁ କିଛି ନ ପଚାରି ତାଙ୍କର ଜନ୍ମ ନିୟନ୍ତ୍ରଣ ଅସ୍ତ୍ରୋପଚାର କରାଇଦେଇଛନ୍ତି। ପୁନମଙ୍କ ଅଭିଯୋଗ ପରେ ସ୍ବାସ୍ଥ୍ୟ ବିଭାଗ ଯାଞ୍ଚ କରିବାକୁ ଦାବି ହେଉଛି।
ଅନ୍ୟପକ୍ଷରେ ହସ୍ପିଟାଲର ଉପଅଧୀକ୍ଷକ ସବ୍ୟସାଚୀ ମଣ୍ଡଳ କୁହନ୍ତି, ବନ୍ଧ୍ୟାକରଣ ଅପରେଶନ ପାଇଁ ମହିଳାଙ୍କ ସହମତି ଜରୁରୀ ଅଟେ। ମହିଳା ସହମତି ଦେବାରୁ ତାଙ୍କର ଜନ୍ମ ନିୟନ୍ତ୍ରଣ ଅସ୍ତ୍ରୋପଚାର କରାଯାଇଥିଲା।
ପୁନମ କହିଛନ୍ତି, ତାଙ୍କ ସ୍ବାମୀ କିମ୍ବା ପରିବାରର କୌଣସ ସଦସ୍ୟଙ୍କ ସହମତି ନ ନେଇ ଡାକ୍ତରମାନେ ତାଙ୍କଠାରୁ ସାଧା କାଗଜରେ ଦସ୍ତଖତ ନେଇ ବନ୍ଧ୍ୟାକରଣ ଅପରେଶନ କରାଇଛନ୍ତି।
