ବେଜିଂ,୧୫।୬: ଚାଇନା ଉପରେ ପୁଣି ନୂଆ ବିପଦ ମାଡ଼ି ଆସୁଛି। କରୋନାର ଅନ୍ତୁଡ଼ିଶାଳ ପାଲଟିଥିବା ଚାଇନା ପୁଣି ସଙ୍କଟ ସୃଷ୍ଟି କରିଛି। ଚାଇନାର ତାଇଶାନ୍ ଆଣବିକ କେନ୍ଦ୍ରରୁ ଅସାବଧାନତା ଯୋଗୁ ଏକ ପ୍ରକାର ଗ୍ୟାସ୍ ଲିକ୍ ହୋଇଛି। ଏହି ଗ୍ୟାସ୍ ନିଷ୍କ୍ରିୟ ଥିଲେ ମଧ୍ୟ ଏଥିରେ ରେଡିଓଆକ୍ଟିଭ୍ ପଦାର୍ଥ ରହିଛି। ଚାଇନା ଏବଂ ଫ୍ରାନ୍ସର ଇଡିଏଫ୍ କମ୍ପାନୀର ମିଳିତ ସହଯୋଗରେ ଏହି ଆଣବିକ କେନ୍ଦ୍ର କାର୍ଯ୍ୟ କରୁଛି। ଇଡିଏଫ୍ କମ୍ପାନୀର ଏହି କେନ୍ଦ୍ରରେ ୩୦ ପ୍ରତିଶତ ଅଂଶଧନ ରହିଛି। ଗ୍ୟାସ୍ ଲିକ୍ ସପ୍ତାହ ତଳେ ହୋଇଥିଲେ ମଧ୍ୟ ଏସମ୍ପର୍କରେ ଚାଇନା ପକ୍ଷରୁ କୌଣସି ଘୋଷଣା କରାଯାଇ ନାହିଁ। ଚାଇନା ସତ ଲୁଚାଇବାକୁ ଚେଷ୍ଟା କରୁଥିବା ଅଭିଯୋଗ ହୋଇଛି। ତେବେ ଫ୍ରାନ୍ସର କମ୍ପାନୀ ରେଡିଓଆକ୍ଟିଭ୍ ପଦାର୍ଥ ରିଆକ୍ଟର ନମ୍ବର-୧ରୁ ଲିକ୍ ହେବା ନେଇ ଆମେରିକାର ସହଯୋଗ ଲୋଡ଼ିଛି। ଇଡିଏଫ୍ ଆମେରିକାର ଶକ୍ତି ବିଭାଗକୁ ସହାୟତା ଲାଗି ଅନୁରୋଧ କରିଛି। ରେଡିଓଆକ୍ଟିଭ୍ ପଦାର୍ଥର ବିକିରଣ ଦ୍ୱାରା ଭୟଙ୍କର ବିପଦ ସୃଷ୍ଟି ହେବାର ଆଶଙ୍କା ରହିଥିବା ଇଡ଼ିଏଫ୍ ଆମେରିକାକୁ କହିଛି। ଚାଇନାର ସ୍ଥାନୀୟ ଲୋକେ ଏହାକୁ ନେଇ ଆତଙ୍କିତ ହୋଇପଡ଼ିଛନ୍ତି। ସୂଚନାଯୋଗ୍ୟ, ୩୫ ବର୍ଷ ତଳେ ୧୯୮୬ ଏପ୍ରିଲ୍ ୨୬ରେ ରୁଷିଆର ଚେର୍ନୋବାୟଲରେ ଏଭଳି ଏକ ରେଡିଓଆକ୍ଟିଭ୍ ପଦାର୍ଥ ଲିକ୍ ଘଟଣା ଯୋଗୁ ଭୟାବହ ସ୍ଥିତି ସୃଷ୍ଟି ହୋଇଥିଲା।
