ପ୍ୟାରିସ୍,୧୩।୬: ବର୍ଷର ଦ୍ୱିତୀୟ ଗ୍ରାଣ୍ଡସ୍ଲାମ ଟୁର୍ନାମେଣ୍ଟ ଫ୍ରେଞ୍ଚ ଓପନ ପୁରୁଷ ସିଙ୍ଗଲ୍ସ ଫାଇନାଲ ମୁକାବିଲା ସ୍ପଷ୍ଟ ହୋଇଛି। ଟାଇଟଲ ପାଇଁ ରବିବାର ଫାଇନାଲରେ ଟପ୍ ସିଡ୍ ସର୍ବିଆର ନୋଭାକ ଜୋକୋଭିଚ୍ ଓ ପଞ୍ଚମ ସିଡ୍ ଗ୍ରୀସ୍ର ଷ୍ଟିଫାନୋସ ସିତିସ୍ପାସ ପରସ୍ପରକୁ ଭେଟିବେ। ପ୍ରଥମ ସେମିରେ ସିତିସ୍ପାସ ମାରାଥନ ୬-୩, ୬-୩, ୪-୬, ୪-୬, ୬-୩ ସେଟ୍ରେ ଷଷ୍ଠ ସିଡ୍ ଖେଳାଳି ଜର୍ମାନୀର ଆଲେକଜାଣ୍ଡର ଜେଭରେଭଙ୍କୁ ହରାଇ ଫାଇନାଲକୁ ଉଠିଥିଲେ। ସେହିପରି ଦ୍ୱିତୀୟ ସେମିଫାଇନାଲରେ କ୍ଲେ କୋର୍ଟର ରାଜା କୁହାଯାଉଥିବା ରାଫାଲ ନାଡାଲ ଆଶ୍ଚର୍ଯ୍ୟଜନକ ଭାବେ ଜୋକୋଭିଚ୍ଙ୍କଠାରୁ ପରାସ୍ତ ହୋଇ ବିରଳ ବିଫଳତାର ସମ୍ମୁଖୀନ ହୋଇଥିଲେ। ଜୋକୋଭିଚ୍ ୪ ଘଣ୍ଟାରେ ୩-୬, ୬-୩, ୭-୬, ୬-୨ ସେଟ୍ରେ ବିଜୟୀ ହୋଇ ଫାଇନାଲକୁ ଉଠିଥିଲେ।
ନାଡାଲ ନିରାଶ
ଫ୍ରେଞ୍ଚ୍ ଓପନ୍ରେ ନାଡାଲ ରେକର୍ଡ ୧୩ଥର ଟାଇଟଲ ଜିତିଥିଲେ ଓ ଏହି ଟୁର୍ନାମେଣ୍ଟ ଅପ୍ରତିଦ୍ୱନ୍ଦ୍ୱୀ ମନେ ହେଉଥିଲେ। ତେବେ ଏହି ପରାଜୟ ତାଙ୍କ ପାଇଁ ଭିନ୍ନ ଅନୁଭୂତି ଆଣି ଦେଇଛି। ଏହି କ୍ଲେ କୋର୍ଟ ଟୁର୍ନାମେଣ୍ଟରେ ପ୍ରଥମଥର ପାଇଁ ନାଡାଲ ସେମି ପରେ ପରାସ୍ତ ହୋଇଛନ୍ତି। ମୋଟ ଉପରେ ଟୁର୍ନାମେଣ୍ଟରେ ସେ ୩ଥର ପରାସ୍ତ ହୋଇଛନ୍ତି ଓ ୨ଥର ସେ ଜୋକୋଭିଚ୍ଙ୍କଠାରୁ ହାରିଛନ୍ତି। ଗତ ୪ଟି ସଂସ୍କରଣରେ ସେ ଟାଇଟଲ ହାସଲ କରିଥିଲେ। ମୋଟ ଉପରେ ୨୦ଟି ଗ୍ରାଣ୍ଡସ୍ଲାମ ଟାଇଟଲ ଜିତି ନାଡାଲ ରୋଜର ଫେଡରରଙ୍କ ସମକକ୍ଷ ହୋଇଛନ୍ତି। ଅନ୍ୟପଟେ ଜୋକୋଭିଚ୍ ପଞ୍ଚମଥର ପାଇଁ ଫ୍ରେଞ୍ଚ୍ ଓପନ ଫାଇନାଲରେ ପ୍ରବେଶ କରିଛନ୍ତି। ତେବେ ୨୦୧୬ରେ ଥରେ ମାତ୍ର ସେ ଚାମ୍ପିୟନ ହେବାର ଗୌରବ ଅର୍ଜନ କରିଥିଲେ। ନାଡାଲଙ୍କୁ ହରାଇବା ପରେ ଜୋକୋଭିଚ୍ ଖୁସି ଜାହିର କରିଛନ୍ତି। ମାଉଣ୍ଟ ଏଭରେଷ୍ଟ ଚଢ଼ିବା ଭଲି ମନେ ହେଉଥିବା ସେ ବିଜୟ ପରେ କହିଛନ୍ତି। ସେ କ୍ୟାରିୟରର ୨୯ତମ ଗ୍ରାଣ୍ଡସ୍ଲାମ ଫାଇନାଲରେ ଅବତୀର୍ଣ୍ଣ ହେବେ।
