ଅନୁଗୋଳ ଅଫିସ, ୬।୬: ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟର ନବକଳେବର ହେବ। ମଲ୍ଟି ସ୍ପେଶିଆଲିଟି ଢାଞ୍ଚାରେ ଏହାକୁ ନିର୍ମାଣ କରାଯିବ। ନୂଆ କୋଠାରେ ପୃଥକ୍ ବହିର୍ବିଭାଗ (ଓପିଡି), ଟ୍ରମା କେୟାର ସେଣ୍ଟର, ବର୍ନ ୟୁନିଟ୍ ରହିବ। ଏହାର ଟେଣ୍ଡର ପ୍ରକ୍ରିୟା ଶେଷ ହୋଇଛି। ଖୁବ୍ଶୀଘ୍ର କାର୍ଯ୍ୟ ଆରମ୍ଭ ହେବ ବୋଲି ଜିଲା ପ୍ରଶାସନ ପକ୍ଷରୁ ଟୁଇଟ୍ କରି ସୂଚନା ପ୍ରଦାନ କରାଯାଇଛି। ଏଥିସହ ପ୍ରସ୍ତାବିତ ଜିଲା ସ୍ବାସ୍ଥ୍ୟକେନ୍ଦ୍ରର ଫଟୋଚିତ୍ର ଟୁଇଟରରେ ଅପ୍ଲୋଡ୍ କରାଯାଇଛି।
ଅନୁଗୋଳ ଜିଲା ସ୍ବାସ୍ଥ୍ୟକେନ୍ଦ୍ରରେ ରୋଗୀଙ୍କୁ ଉନ୍ନତମାନର ସେବା ଯୋଗାଇ ଦେବାକୁ ଦୀର୍ଘଦିନରୁ ଦାବି ହୋଇ ଆସୁଥିଲା। ଏ ନେଇ ବୁଦ୍ଧିଜୀବୀ ସମେତ ବିଭିନ୍ନ ସଙ୍ଗଠନ ପକ୍ଷରୁ ଆନ୍ଦୋଳନାତ୍ମକ ପନ୍ଥା ଗ୍ରହଣ କରାଯାଇଥିଲା। ବିଳମ୍ବରେ ହେଲେ ମଧ୍ୟ ଏହାକୁ ହୃଦୟଙ୍ଗମ କରିଛନ୍ତି ରାଜ୍ୟ ସରକାର ଏବଂ ସ୍ବାସ୍ଥ୍ୟ ବିଭାଗ। ଶିଳ୍ପସମୃଦ୍ଧ ଅନୁଗୋଳ ଜିଲାରେ ଦୁର୍ଘଟଣା ବଢୁଛି। ଆନୁଷଙ୍ଗିକ ଭିତ୍ତିଭୂମି ଅଭାବରୁ ଜିଲା ଚିକିତ୍ସାଳୟକୁ ଆସୁଥିବା ଦୁର୍ଘଟଣାଗ୍ରସ୍ତଙ୍କୁ ତୁରନ୍ତ ଚିକିତ୍ସା ସୁବିଧା ଯୋଗାଇ ଦେବାରେ ସମସ୍ୟା ଉପୁଜୁଛି। ଟ୍ରମା କେୟାର ସେଣ୍ଟର ଏହି ଅଭାବ ପୂରଣ କରିବ। ସେହିପରି ନିଅଁାରେ ପୋଡ଼ିହୋଇ ଆସୁଥିବା ରୋଗୀମାନଙ୍କୁ କଟକ ବଡ଼ ମେଡ଼ିକାଲ ନଚେତ୍ ରାଉରକେଲା ଆଇଜିଏଚ୍ ହସ୍ପିଟାଲକୁ ସ୍ଥାନାନ୍ତର କରି ଦିଆଯାଉଥିଲା। ବର୍ନ ୟୁନିଟ୍ ଖୋଲିବା ପରେ ରୋଗୀ ସୁବିଧାରେ ଚିକିତ୍ସିତ ହୋଇପାରିବେ। ଏହାକୁ ବାଦ୍ଦେଲେ କିଡ୍ନୀ, ହୃଦ୍ରୋଗୀଙ୍କ ଲାଗି ପୃଥକ ଓପିଡି ଖୋଲିବ। ନୂତନ ମେଡିକାଲରେ ମୁଖ୍ୟ କୋଠା, ପାର୍କିଂ ସୁବିଧା ରହିବ। ରୋଗୀଙ୍କୁ ଉତ୍ତମ ମାନର ସେବା ଯୋଗାଇ ଦିଆଯିବ। ଏହାଦ୍ୱାରା ପଡ଼ୋଶୀ ଜିଲାର ରୋଗୀ ମଧ୍ୟ ଉପକୃତ ହେବେ ବୋଲି ସୂଚନା ପ୍ରଦାନ କରାଯାଇଛି। ଜିଲାବାସୀଙ୍କ ଦୀର୍ଘଦିନର ଦାବି ପୂରଣ ହୋଇଥିବାରୁ ଏହାକୁ ବିଭିନ୍ନ ମହଲରେ ସ୍ବାଗତ କରାଯାଇଛି।
ଏ ନେଇ ଜିଲାପାଳ ସିଦ୍ଧାର୍ଥ ଶଙ୍କର ସ୍ବାଇଁ କହିଛନ୍ତି, ନୂତନ ମେଡିକାଲ ପାଇଁ ଟେଣ୍ଡର ପ୍ରକ୍ରିୟା ଶେଷ ହୋଇଛି। ଏହାର କାର୍ଯ୍ୟ ଖୁବ୍ଶୀଘ୍ର ଆରମ୍ଭ ହେବ। ଯଥାଶୀଘ୍ର କାମ ଶେଷ କରି ରୋଗୀଙ୍କୁ ସେବା ଯୋଗାଇ ଦେବାକୁ ଉଦ୍ୟମ କରାଯିବ।
ଆସିବେ ୨୫ ନୂଆ ଡାକ୍ତର
ରାଜ୍ୟ ସରକାର ଅନୁଗୋଳ ଜିଲା ପାଇଁ ୨୫ ଜଣ ଡାକ୍ତରଙ୍କୁ ନିଯୁକ୍ତି ଦେଇଛନ୍ତି। ସେମାନଙ୍କ ମଧ୍ୟରୁ କେତେଜଣ ଯୋଗଦେଲେଣି। ଅନ୍ୟମାନେ ଖୁବ୍ଶୀଘ୍ର ଜିଲାର ବିଭିନ୍ନ ସ୍ବାସ୍ଥ୍ୟକେନ୍ଦ୍ରରେ ସେବା ଯୋଗାଇବେ ବୋଲି ସିଡିଏମ୍ଓ ଡା. ତ୍ରିଲୋଚନ ପ୍ରଧାନ ସୂଚନା ଦେଇଛନ୍ତି। ସୂଚନାଯୋଗ୍ୟ, ଜିଲାର ବିଭିନ୍ନ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଦୀର୍ଘଦିନ ହେଲା ଡାକ୍ତର ପଦବୀ ଖାଲି ପଡ଼ିଥିଲା। ରୋଗୀମାନେ ଜିଲା ମୁଖ୍ୟ ଚିକିତ୍ସାଳୟ ଉପରେ ନିର୍ଭର କରୁଛନ୍ତି। ଜିଲା ସ୍ବାସ୍ଥ୍ୟ ବିଭାଗ ଉପରେ ଚାପ ବଢୁଥିବାରୁ ରାଜ୍ୟ ସରକାର ଜିଲା ପାଇଁ ୨୫ ଡାକ୍ତରଙ୍କୁ ନିଯୁକ୍ତି ଦେଇଛନ୍ତି। ଆଠମଲ୍ଲିକ ଅଞ୍ଚଳରେ ଏମ୍ବିବିଏସ୍ ଡାକ୍ତରଙ୍କୁ ନିଯୁକ୍ତି ଦିଆଯାଇଛି। ଅନ୍ୟମାନେ ଆସିବା ପରେ ସେମାନଙ୍କୁ ନିଯୁକ୍ତି ପ୍ରଦାନ କରାଯିବ ବୋଲି ଜିଲା ମୁଖ୍ୟ ଚିିକିତ୍ସାଳୟ ପକ୍ଷରୁ କୁହାଯାଇଛି। ଏ ନେଇ ସିଡିଏମ୍ଓ କୁହନ୍ତି, ରାଜ୍ୟ ସରକାରଙ୍କ ପକ୍ଷରୁ ଓପିଏସ୍ସି ପରୀକ୍ଷା କରାଯାଇ ଏମବିବିଏସ୍ ଡାକ୍ତରଙ୍କୁ ନିଯୁକ୍ତି ପ୍ରଦାନ କରାଯାଉଛି। ଅନୁଗୋଳ ଜିଲାରେ ସମସ୍ତ ୨୫ ଡାକ୍ତର ଯୋଗଦେବା ପରେ ରୋଗୀଙ୍କୁ ଉତ୍ତମ ସେବା ପ୍ରଦାନ କରିବା ସହଜ ହେବ।
